Poslovne vesti - Makedonija

Субвенции бараат 5.300 земјоделци во Струмичко

Околу 5.300 земјоделски производители од Струмичкиот регион и годинава ќе користат субвенции што Владата ги издвојува за поттикнување на аграрот.

Покрај барањата за финансиска поддршка на земјоделското и сточарското производство, до Подрачната единица за земјоделство, шумарство и водостопанство се поднесени и околу 900 апликации за производство на млеко.

- Од година во година Владата го зголемува вкупниот фонд за субвенционирање на земјоделството и сточарството, а процедурите за поднесување документи се поедноставуваат и на апликантите им се олеснува можноста да добијат помош од државата за тоа што ќе го посеат на своите парцели или ќе го одгледуваат како сточен фонд - вели Бори Галев, раководител на Подрачната единица во Струмица.

Според првичните сознанија, најголем дел од апликациите и годинава ќе бидат за субвенционирање на производството пченка, оранжериско, пластеничко и производство на ран и индустриски зеленчук на отворено, а дел од барањата се однесуваат на фуражни култури и одгледување ситен добиток.

Наспроти ова, драстично помал е интересот на струмичките земјоделци за користење на фондовите од програмата ИПАРД, пред се', поради фактот дека за пристапот до овие средства е потребно сопствено учество, а најголем дел од фармерите немаат пари за инвестирање.